Continuando coa idea de desenvolver metodoloxías complementarias ás que desenvolvemos no día a día na escola, e facendo énfase nos aspectos positivos das pedagoxías activas que nos permiten implementar actuacións que melloran o noso proceso de ensinanza aprendizaxe, continuamos adaptando para o terceiro ciclo a experiencia que chamamos "Circula" na que, un día á semana, traballaremos do seguinte xeito:
Dúas primeiras horas: TEMPO PARA EXPERIMENTAR
Nestas horas desenvolveranse actividades encamiñadas a reforzar aqueles contidos educativos relacionados coas nosas áreas de coñecemento e que consideramos que precisan un tratamento significativo e poden complementarse interactuando entre si.
Terceira e cuarta horas: TEMPO DE INVESTIGAR
Nestas horas, mediante agrupacións baseadas en focos de interese, desenvolverase unha actividade de investigación, elaboración e exposición sobre unha ou varias temáticas previamente escollidas en asemblea.
Última hora: DIARIO DO DÍA
Que fixemos hoxe? Que aprendimos hoxe? Que dúbidas nos quedaron ou que dificultades tivemos?
Temas, frases, descubrimentos… que son novidosas e nos fixeron pensar ou nos chamaron a atención.
Esas cousas coas que nos quedamos e que estariamos dispostas ou dispostos a explicárllelo a outras persoas.
Nesta hora final, mantendo os grupos dos obradoiros, desenvolverase unha actividade de reflexión e síntese.
