A Escola
Rapazada, mestres e familias tecemos e afianzamos os vimbios básicos para medrar sans neste entorno seguro. Tentamos dotar o alumnado das ferramentas psicolóxicas, relacionais e académicas necesarias para acadar o pleno desenvolvemento individual.
O noso propósito é
poder educar persoas críticas, solidarias, autónomas, feministas, respectuosas co medioambente, amantes da nosa cultura e tradición e con conciencia social.
Persoas que perciben a escola como refuxio, lugar ao que pertencen porque aquí, un día, se sentiron queridas e seguras.
Sobre cada persoa descansa unha mirada diferente que respecta a súa individualidade e se adapta ás súas necesidades confiando sempre nas súas posibilidades. En definitiva, unha escola que se basea na escoita.
Proxecto educativo
As características metodolóxicas máis sobresaíntes que definen a nosa escola.
O espazo
Temos o privilexio de estar en plena natureza nun terreo de 17.000 m2 de espazos verdes.
Estamos situados nunha lagoa, á beira do nacemento do río Lagares con múltiples espazos que propician clases ao aire libre, posibilitando as interaccións co medio e a observación da fauna autóctona. A escola é un contexto de xogo, descubrimento e relación.
Os interiores
O longo da xornada o alumnado vai visitando as “casiñas” onde residen as diferentes materias.
Cada materia impártese na aula do mestre/a especialista. A rapazada de primaria e secundaria cambia de “casiña” , circulando polo patio en compañía do seu grupo de referencia cara a un novo espazo onde os agarda o adulto, especialista, nun contexto que busca espertar a súa curiosidade, semente de toda aprendizaxe.
O profesorado
Os nenos e nenas da escola reciben clase de diferentes profesores e profesoras en función de consideracións psicopedagóxicas.
Na etapa de infantil e no primeiro ciclo de primaria (1º e 2º), a rapazada pasa a maior parte da xornada coa súa mestra ou mestre xa que é moi importante nesas idades ter un adulto de referencia.
A nosa metodolox铆a
Para propiciar o desenvolvemento integral do noso alumnado, a maneira de traballar ten que permitir diferentes metodoloxías atendendo a diferentes variables: obxectivos, contidos, espazos, idades… pero sempre teñen que estar baseadas no principio de que o neno ou nena é o protagonista, o centro da escola.
Tendo isto en conta, a nosa metodoloxía bebe de moitas outras escollendo as que mellor se adapten a cada materia e momento evolutivo. Algúns trazos que nos definen son:
METODOLOX脥AS ACTIVAS E COLABORATIVAS
O alumnado ten que ser parte activa da súa aprendizaxe, partindo da súa curiosidade, experimentando, argumentando, interactuando con docentes e compañeiros, colaborando a través de diferentes agrupamentos (grupo grande de referencia, grupos pequenos dentro do seu curso, mesturándose con outros cursos, desdobrándose con distintos docentes...). A aprendizaxe baseada en proxectos, na resolución de problemas reais e na posta en común é fundamental.
CONTIDOS ALTERNATIVOS
Un desenvolvemento holístico e integral das nenas e nenos só é posible se se inclúen contidos e experiencias que complementen o seu proceso educativo. Contamos con diferentes materias como; dramatización, psicomotricidade, imaxe e artes.
AS SA脥DAS
Unha escola inserida na súa realidade social e natural significa unha programación de contidos atenta á cultura á que pertence. A observación, a análise e a capacidade crítica dos nenos e nenas espértanse tanto dentro da aula como nas saídas programadas. O traballo realizado no exterior permite o exercicio da experiencia directa e o fomento da convivencia. Pretendemos achegar os nenos e nenas ás propostas culturais da cidade e da súa contorna:
Estudamos e desfrutamos da arte en directo: visitamos museos, asistimos a obras de teatro e animamos á lectura nas bibliotecas...
Exploramos a riqueza natural da nosa privilexiada contorna con excursións e roteiros a diferentes lugares significativos (montes, praias, parques...).
Buscamos a convivencia durante períodos de tempo que rompen a rutina da rapazada a través de saídas de día completo (dende 4º de infantil en adiante) ou viaxes de unha ou máis noites a partir de 1º de primaria. Resulta unha marabilla ver a cara das nenas e nenos tras esa primeira noite cos seus amigos; parte do proceso de medrar. A viaxe de 4º de ESO, na que se combinan lecer e cultura, supón o merecido broche final a anos compartidos cos seus compañeiros e compañeiras.
PROGRAMAS ESPEC脥FICOS DE FORMACI脫N DO ALUMNADO
Unha escola que pretende colaborar coas familias na formación integral do alumnado non pode descoidar aspectos fundamentais que complementan o desenvolvemento da súa personalidade. Nós tentamos aportar formación complementaria a través de diferentes programas formativos que teñen máis presenza na adolescencia pero que comezan a sementarse nas primeiras idades:
Programa de Educación afectivo-sexual
Programa de prevención de drogas e doutras adiccións
Charlas sobre o uso responsable das TRICS (Tecnoloxías, Internet, Redes Sociais...)
Contidos alternativos
Dende os seus inicios, no Martín Codax incorporáronse ao currículo as seguintes materias. A escola é canteira de grandes artistas que atoparon o seu camiño na creatividade.
Dramatización
Un día á semana dende 1º de primaria e unha vez cada 15 días en 1º e 2º de ESO, o alumnado ten a posibilidade de medrar aprendendo a través das relacións que xorden no xogo espontáneo ou regrado, sentindo a través da representación dun papel diferente ao habitual que os coloca no lugar do outro, empatizando e dialogando como vía para a resolución de conflitos.
Psicomotricidade
Nas primeiras etapas (infantil e primeiro ciclo de primaria), as relacións e o desenvolvemento da propia imaxe faise a través do corpo e o movemento, axudando a construírse dunha maneira integral, de aí a importancia destas sesións dentro do horario escolar.
Imaxe
Palabra e imaxe fúndense nesta área. O poder da imaxe como medio para identificarnos, recoñecernos e recoñecer outras realidades diferentes e posibles é fundamental para desenvolver ese pensamento crítico que cuestione, indague e mobilice.
Unha vez cada 15 días, dende 4º de Infantil ata 4º de ESO, terán diferentes propostas para interpretar, a través de imaxes seleccionadas (curtas de animación, documentais, películas…) unha realidade plural e cambiante.
As Artes
As áreas de expresión artística (Plástica, Música, Teatro, Literatura, Cine...) son fundamentais na nosa escola. Axudan a expresar sentimentos, vivencias; animan a crear, a expoñerse á mirada e o xuízo dos outros, a respectar as outras miradas, a desenvolver o espírito, a comprender que non existe unha única forma de expresión, a desfrutar e compartir.
Tomando as palabras da filósofa Jodi Dean, a nosa escola traballa coa intención de "construír unha estrutura afectiva capaz de ampliar o mundo".
Unha estrutura capaz de organizar os procesos de aprendizaxe mentres, á súa vez, propicia a tarefa permanente do autocoñecemento, as relacións cos outros e o amor polo saber e polas expresións culturais en todas as súas dimensións.
Unha escola, polo tanto, capaz de acubillar o proceso de crecemento integral do alumnado anudando afecto, respecto e desenvolvemento do pensamento. Unha escola que faga mirar para un mesmo, para os outros e para o mundo dende a confianza e o gusto pola vida.